家鄉咸湯圓

尋晚同老公一小段好低能既對話 :

我 : daddy 記唔記得咸湯圓有咩料 ?

老公 : 咪蘿蔔 .紹菜 .魚肉 .芫茜同年糕囉 !!

我 : 吓 ! 咩年糕呀 ^^ 湯圓先啱呀 !

老公 : 呀 !係呀 ^^ 你想整呀 ?

我 : 你想食我咪整囉 ~

老公 : 你整我咪食囉 ~

我 : 咁你食我咪整囉 ~

今日去街市買左材料今晚煮 ,

佢唔係我家鄉既食品 ,

不過係同老公結婚之後奶奶在生前每年既冬至都會食到 ,

我仲成日以為係新年先食 ,

其實奶奶走左之後 ,

每年過年都想整但係冇一年整過 ,

只係得番小小記憶 ,

不過都整得似模似樣 .

材料 : 約 4 人份量

娃娃菜 1包   芫茜   2 扎   芹菜    5 -6 棵

蘿蔔   1個   瘦肉 $15    鯪魚肉   半斤

糯米粉   300g 逐少加入暖水搓成軟硬適中的麵糰

清雞湯   1公升 清水   適量

調味料 :

鹽 ,麻油 ,胡椒粉   適量

將蘿蔔切條 ,瘦肉切小粒預先調味 ,菜類切好 .

小嘟幫我將粉糰搓成細細粒既湯圓

清雞湯加水煮滾加入蘿蔔 ,娃娃菜煮淋 ,

再放入瘦肉待滾起 ,

鯪魚肉用筷子薄薄夾起條狀放入滾湯中煮至大滾 .

湯圓分次加入滾湯中

湯圓煮熟後會浮起 ,試味後可加鹽調味 .

加入芫茜 ,芹菜拌勻熄火 ,

食既時侯先落麻油同胡椒粉 .