軟心南瓜曲奇

見個南瓜擺左係道成個月 ,

尋晚又手痕好想整野 ,

呢個食譜係上網揾既 ,

不過已經唔記得左係邊度揾架啦 ,

原食譜既南瓜蓉比得好少 ,

我自己加多左落去 .

焗既時侯成屋都係南瓜味 ,

好鬼香 !

呢款曲奇放涼左即刻食係外脆內軟好得意 ,

而入盒之後外邊就會唔脆 ,

但係食落就有少少煙 un 同食到好香既南瓜味 ,

唔知今日有份食既各位靚女同唔同意呢 !

食譜要遲少少先得閒加番上黎 ,

各位睇住相先啦 !

 不過尋晚唔記得同大女講 d 曲奇係我要拎比人食既 ,

今朝起身見個盒得番一半曲奇係裏面咋 !

(原本有 30幾粒架 )

想再整都整唔切 ,冇計 !

唯有照拎晒出去啦 ,

佢放學返黎同我講話 d 南瓜曲奇好搶手 ,

一陣就比人搶晒喎 !!! 

今日都整左另一款小鬆餅 ,

留番下次先介紹啦 !

軟心南瓜曲奇 .

材料 :可做 32 粒

南瓜蓉   150g    無鹽牛油   100g   糖   70g

低筋粉    200g   玉桂粉    1/4茶匙    提子乾    適量

做法 : 

1 .先將南瓜切粒放入微波爐加熱 2 分半至 3 分鐘 ,

襯熱用叉搓爛放涼備用 . 

亦可使用焗爐 .

如用水蒸熟南瓜 ,

要盡量將水份隔乾 ,

否則麵糰會過濕. 

2 .牛油室温放軟加糖打至鬆發成乳白色 ,

加入南瓜蓉拌勻 .

3 .篩入預先拌勻的低筋粉和玉桂粉 ,

以切拌方式拌勻成麵糰 .

4 .用兩隻茶匙協助將麵糰分成 15g 一份 .

5 .將麵糰搓圓再輕輕按平 ,不用太平 .

6 .用小匙在麵糰側面均勻壓出 6 條紋路 .

7 .中央打直壓入一粒提子乾 ,

放入已預熱 170 度的焗爐中 ,

焗 15 分鐘 ,

熄火待在爐內 10 分鐘 ,

出爐放涼入盒保存 .