可愛小狗狗 ~ 逐格睇

   大家係咪等佢等得好心急呢吓 !

不過我要先係度同大家講聲 ,

呢隻狗仔蛋糕係我睇完食譜書既大概造型 ,

再加自己既構思整出黎既 ,

當中有部份方法應該係做錯架 ,

尤其係打忌廉同溶朱古力既部份 .

呢張相我一睇見佢個 pat pat 就好想打佢兩野 .

材料 :

低筋粉    80 g       鹽   1 g

糖    100 g       發粉    2g

雞蛋   5 隻     鮮奶    40 g

他他粉      半茶匙        粟米油    40 g

外型裝飾 :

甜忌廉 200 g      可可粉 2 大匙

先將 30 - 40 g 甜忌廉打起放雪櫃 ,

其餘甜忌廉加入可可粉用打蛋器 ( 不用開動 ) 拌勻成朱古力忌廉

打起放雪櫃 .

耳朵及眼 ,鼻用 :

入爐朱古力粒    50g      鮮奶  5 - 6 茶匙

朱古力榛子醬或自己喜愛的抹醬 ( 蛋卷餡 )

做法 : 預熱焗爐 180 度

1 .先在瑞士卷焗盆中舖上牛油紙 .

2 .將低筋粉 ,發粉 ,鹽篩勻 ,蛋黃放入牛奶 ,粟米油中輕輕伴至完全勻合.

3 .蛋白放於乾淨大盆中 ,加入他他粉打至起泡 ,糖分 3 次加入打至企身.

4 .蛋漿分3次加入蛋白中輕手覆勻 ,每次勻要完全拌勻 ,再將粉類混合物分3 次篩入輕手覆勻 ,每次亦要完全拌勻 .

5 .倒入焗盆抹平 ,將焗盆於檯面輕輕敲打 2 ,3 下 ,將氣泡放出 ,入爐焗 18 分鐘至熟透 .出爐即倒扣於另一牛油紙上 ,撕去底部的牛油紙 ,放架上待涼 .

7 .蛋糕放涼後 ,於短的一邊先切出約 1 吋半留起做手 ,腳及耳朵 ,再於長的一邊由頭至尾輕輕用刀切三條直線 ,不用切斷 .

8 .抹上朱古力榛子醬 ,用卷壽司的方法在切口一邊卷起 ,卷好後放雪櫃約半小時待定型 .

***如家庭式焗爐將份量減半***

將切出的 1 吋半蛋糕切成 4 塊小梯形做手同腳 ,

耳朵的長短可自行決定 .

耳朵部份的蛋糕平均切開 2 份 ,

連同手腳用保鮮紙包好 .

在蛋糕面抹上餡醬卷好 ,

放雪櫃定型 .

將蛋卷切成長度適中

( 請因應自己蛋糕盒的長度 )

切出的蛋卷頭可切多或切小留起做面及咀部 ,

可做長咀或短咀狗仔 .

呢隻係做短咀狗仔 .



再將多出的蛋卷切 2 件約 1 吋的蛋卷 ,

用作頭頂及尾頂 .

每件先斜切去同等大小的一角 .

在蛋卷面抹上一層薄 cream ,

將切出的蛋卷頭貼在一邊的切口上 ,

中間位亦要貼上多出的碎蛋糕 ,

再抹上一層薄 cream ,

做成狗仔的面及咀部 .



將 2 件 1 吋的蛋卷分別放在頂部的一頭一尾 ,

切去的部份打對放 ,

輕輕手將蛋卷按貼 ,

抹上一層薄 cream ,

將用作手 ,腳的梯型蛋糕短的一邊向出 ,

長的一邊抹小小 cream ,

貼好在四邊平均位置 .



預備 2 個同花的唧咀及唧袋 ,

將朱古力 cream 裝入唧袋 ,

由 pat pat 位開始唧花 ,

狗仔樣貌可自行設計 .

尾巴亦可自行造形 .

朱古力粒用熱水座溶 ,

逐少加入鮮奶調成可沾上蛋糕面的朱古力漿 ,

不能太稀或太杰 ,

加入的鮮奶亦要看朱古力的稀杰程度加多或減少 .

先預備一小張牛油紙 ,

將蛋糕片放入朱古力漿中沾上朱古力 ,

只須沾一邊 ,

用牙籤小心將蛋糕片取出 ,

用刀輕輕將朱古力漿抹平 ,

放入雪櫃雪至表面乾透 .



餘下的朱古力漿裝入小密實袋稍放涼 ,

於角位剪一小孔 ,

在狗仔面部唧出一對眼睛 ,

用牙籤加以修飾 ,唧出鼻仔 ,

亦要加以修飾 ,

再唧嘴部 .

最後小心起出耳朵 ,

要注意朱古力會痴實牛油紙 ,

在底部抹上忌廉 .

平均貼上狗仔頭部兩邊 ,

輕輕按實 .