三色千層酥 ( 芋頭 ,栗子 ,蕃薯酥 )

呢個伴手禮係為左 T&P 係我之前整過芋頭酥既一句留言 ,

佢話 : 真係想試下你啲芋頭酥 !

唔知 T&P 你仲記唔記得呢 ,

咁難得佢黎香港喎 !

我一定會整比佢試架 .

適逢 30號中心既雅妍會團年 ,

但係我出席唔到 ,

不過我人唔到都好想整野食返去比一班靚太食 ,

小嘟又叫我要留 d 係屋企食 ,

所以就整多 d 份量叫老公帶返去 ,

以下整左 3 份半既份量 ,

總共整左 84 個酥酥 ,

我預先早一日做好個餡 ,

因為要整咁多個 ,

所以係攤凍之後 ,

我就分埋搓圓用保鮮紙包好放雪櫃先 .

到整果陣就快好多啦 !

先黎介紹餡既做法 ~

芋蓉餡
材料 :

芋頭    600g 糖    220g   粟米油    50g

做法 :

1 .先將芋頭切粒蒸熟 ( 約 25 分鐘 ) ,即放入鑊中襯熱搓爛 .

2 .灑入糖炒勻 ,再分次加入粟米油炒至軟滑 ,放涼備用 .

栗子餡
材料 :

桂林椎   600g     糖    30g     

淡忌廉 100g   橄欖油   1湯匙

1 .先將栗子肉煮數分鐘襯熱去皮 ,再放回煲內加水煮淋 ,約 40 分鐘隔乾水份 ,襯熱用壓薯蓉工具壓成蓉或用攪拌機打爛 .

2 .將栗子蓉放入鑊中加糖先炒勻 ,再加橄欖油炒勻 .

3 .再將淡忌廉分次加入炒勻 ,放涼即可 . ( 可預早一日炒好放雪櫃 )

各位唔好意思呀 ,

因為個蕃薯餡我用左雞蛋黃蕃薯黎整 ,

整得唔夠甜 ,

又冇蕃薯味 ,

失敗左所以唔出啦 !

希望各位唔好介意呀 ,

下次都係要買日本蕃薯整先得 

皮既材料分 2 部份 : ( 1 ) 油皮

中筋粉 200g     糖粉 10g    水    100g

固體菜油    70g ( 改用無水奶油 )

做法 :

先將乾料拌勻 ,

加入無水奶油用手爪勻 ,

再加入水份搓揉 5 - 6 分鐘 ,

蓋上保鮮紙醒 40 分鐘 .

油酥部份分別用既色素 : 蕃薯 ( 橙色素同雲尼拿香油 )

 栗子 ( 啡色素同沖繩黑糖香油 )

   芋頭 ( 香芋香油 )

( 2 ) 油酥

低筋粉    160g

固體菜油    70g ( 改用無水奶油 )

做法 :

將材料搓勻加入適量色素搓至顏色均勻 ,

用保鮮紙包好放雪櫃 ( 冬天不用放 ) .

先將油皮分成 12 份 ,

約 31-32g 一份

再將油酥分成 12 份 ,




約 20g 一份

將所有油皮包入油酥 ,

邊位要厚 d .

( 排放盆中用保鮮紙遮蓋保濕 )

預備工具 :


餡料 ,高筋粉 ,麵棍 ,小刀 ,膠墊

先取一份皮材料開口向下按平 ,

用麵棍輾平成牛舌形 ,

左右向內卷向中間 .

用手輕輕按平 ,


再用麵棍輾薄 ,

由上往下卷起 .

卷成蛋卷形 ,


用小刀在中間位置切開成 2 份 ,

灑少少高粉在膠墊面 ,

取一份切口向上 ,

輕手按平 .

用麵棍小心輾平 ,

盡量不要輾爆邊位 ,

用貼著膠墊的一邊包入一粒餡 ,

以摺邊手法收口放上焗盆 ,

其間要用保鮮紙遮蓋 .

焗爐預熱 170 度焗 20-25 分鐘至餅皮表面呈明顯圈紋 ,

中段要將焗盆前後位置倒轉 ,

使其可均勻受熱 .

焗好晒啦 !

比個近鏡大家睇睇 ,有冇流口水呢