椰子曲奇

原本係黎緊既 23號星期日 ,

我地係去台南旅行 ,

不過天災無情 ,

以至人間慘劇 ,

亦都令到我地既行程改左去海南島 ,

我會去 4日 ,

不過大家黎到記得飲啖茶 ,

食件曲奇 ,

同留低幾蚊雞(留言)先走呀 !

因為聽日差唔多全日都會唔得閒回覆各位既留言 ,

星期日好早就出門 ,

我返黎會盡快回覆架啦 !

 整左個都幾多工夫既椰子曲奇 ,

食譜係網友 "如月" 道偷師返黎既 ,

係呢道要多謝 "如月"分享食譜 . 

材料 : 

椰絲    320g , 糖    130g ,

淡忌廉    200g ,   蛋黃   100g

將椰絲 ,糖 ,淡忌廉 ,蛋黃順序加入大碗中 .

用木刮攪勻 .

放入保鮮盒入雪櫃冷藏一晚 ,讓材料有充份時間吸收 .

將椰蓉分成 15g一份 ,放於保鮮紙上 .

先搾成球狀 .

再取一份椰蓉放上保鮮紙上 .

將保鮮紙擰緊

分別用呢三隻手指 ,擺成三角形 .

將包好的椰蓉整型成三角形

(要用另外一隻手幫手架 ,不過因為要影相) .

一打開係唔會有咁靚架!

仲要用手隔住保鮮紙黎整靚佢 .

全部都整成金字塔形啦 ,

放係室温 15分鐘至表面乾身

200度焗 8分鐘 .

放涼左即食係外脆內軟 ,

但係放入保鮮盒存放係會變左淋身架啦!